މިރަށް މަޝްހޫރުވެފައި ވަނީ ކުދި ފިޔާ ހައްދައިގެން އިނާމު ލިބިފައިވާ ރަށެއްގެ ގޮތުގައެވެ. މިރަށުގައި ހުންނަ ލޮއި ކުރެންދޫ ޒިޔާރަތް، ކުރެންދޫ ވަޅުކޮޅު، ހުކުރު މިސްކިތް، މާލޫދު ހަރުގެ އަދި 200 އަހަރު ދުވަހަށްވުރެ ގިނަ ދުވަސްވެފައިވާ، އަނދިރި ނިކަގަސް ފަދަ ތަންތަނަކީ މިރަށުގައި ހުރި މުހިންމު އަދި އާޘާރީ ތަންތަނުގެ ގޮތުގައި ފާހަގަކުރެވޭ ތަންތަނެވެ. ކާބަފައިންގެ ޒަމާނުއްސުރެ ކޮންމެ އަހަރެއްގެ އަޟްޙާ ޢީދު ދުވަސް ފާހަގަކުރުމުގެ ތެރެއިން ކުރެންދޫ ލޮއިޒިޔާރަތުގައި އޮންނެވި ޔޫސުފު ނަޖީބުލް ޙަފްސީ "ޙަފްސީގެފާނު" މަހާނަކޮޅުގެ ވެލި ބަދަލުކުރުމުގެ މަސައްކަތް، ޘަޤާފީ ކަމެއްގެގޮތުގައި މިރަށުގައި ކޮށް އުޅުނެވެ.