ހދ.ކޭލަކުނު

އިއުލާން/ގަވާއިދު ނަންބަރު:

(IUL)438-ENV/438/2018/322

ޤުދުރަތީ އަދި ޠަބީޢީގޮތުގައި ރައްކައުތެރިކޮށް ދަމަހައްޓާ ގިންތި:

ބައުންޑްރީގައި ހިމެނޭ ރަށްތައް:

ހދ. ކޭލަކުނު

ހިމާޔަތްކޮށްފައިވާ ސަރަހައްދެއްކަން ކަނޑައެޅުނު ސަބަބުތަކާއި މިތަނުގެ ޚާއްޞަ ސިފަތައް:

ހދ. އަތޮޅަށް ނިސްބަތްވާ ކޭލަކުނަކީ ޤުދުރަތީގޮތުންނާއި ތިމާވެށީގެ ގޮތުން ޚާއްޞަ ސިފަތަކެއް ލިބިގެންވާ، ދިރޭތަކެތީގެ ޚާއްޞަ ބާވަތްތަކުން މުއްސަނދި، އަދި ދިރޭތަކެތީގެ ނަސްލާއި އިންސާނުންގެ ހަރާކަތްތަކާއި ގުޅިފައިވާ މީހުންދިރިނޫޅޭ ރަށެކެވެ. މިރަށަކީ އާދަޔާ ޚިލާފަށް ފެހި، ރަށުގެ އިރުމަތީ ފަރާތުގައި ކުޅި، ފާ، ޗަސްބިން އެކުލެވޭ ގޮތަށް އުފެދިފައިވާ ރަށެކެވެ. ރަށުގެ ބޮޑުބައެއްގައި ކަނޑޫފަލާއި، ބޮޑަވަކި އަދި ކުއްޅަވައްގަހުގެ އިތުރުން މުޅި ދުނިޔޭގައިވެސް މަދުން މެނުވީ ނުހެދޭ ބާވަތެއް ކަމުގައިވާ "ބަރު" ގަހުގެ ބޮޑު ޖަންގައްޔެއް އުފެދިފައިވާ ތިމާވެށީގެ ގޮތުން ވަރަށް ޚާއްޞަ ސިފަތަކެއް ލިބިފައިވާ ރަށެކެވެ. މިރަށުގައި ހެދިފައިވާ އެންމެ ބޮޑު ބަރު ގަސްތަކުގެ ވަށަމިނުގައި 24 ފޫޓު ހުންނައިރު 49 ފޫޓަށްވުރެ އުސްކޮށް ހުންނަ ބޮޑެތި ގަސްތައް ބޯކޮށް ހެދިފައިވާކަން ވެސް ފާހަގަކުރެވެއެވެ.

މިރަށުގެ އެންމެ ޚާއްޞަ ސިފައަކީ މިރަށުގެ އިރުމަތީ ފާރާތުގައި ޖަންގައްޔެއްގޮތަށް އުފެދިފައިވާ ކުޅިއާއި ޗަސްބިން (mangroves) ސަރަހައްދެވެ. ބޮޑެތިކޮށް ގިނައަދަދަކަށް ހެދިފައިވާ ކަނޑޫފާ (small-leafed orange mangrove) އަދި ރަނޑޫގެ (red mangrove) އެކި ވަރުވަރަށް ހެދި ބޮޑުވެފައިވާ ގަސްތަކާ، އެގަސްތަކުގެ މޫތަކުން ހެދިފައިވާ ނެޓްވާކެއްގެ ތެރޭގައި ކުދި ކުޅިތަކާއި ބޮޑެތި ބަރު ގަސްތައް (grey mangrove) ފެތުރިފައިވާ ސަރަހައްދަކީ ވަރަށް ރީތި، ހިތްގައިމު އަދި ދިރޭތަކެތީގެ ނަސްލުތައް މުއްސަނދި ސަރަހައްދެކެވެ. މި މާޙައުލުގެ ތަފާތުކަމުގެ އިތުރުން މިސަރަހައްދަކީ "ކާބަން ސިންކް" އެކެވެ. މިރަށަކީ ދޫނީގެ ގިނަ ބާވަތްތަކެއް ގަވާއިދުން ޒިޔާރަތް ކުރާރަށެކެވެ. މިރަށް ސާވޭކުރުމުގެ ތެރޭގައި ކުރި ދަތުރުގައިވެސް 11 ބާވަތެއްގެ ދޫނި ވަނީ ފެނިފައެވެ. މީގެ އިތުރުން ރާއްޖެއިން މަދުން ފެންނަ ދޫންޏެއްކަމަށްވާ ދަނޑިފުޅު ދޫނި (white-tailed tropical bird) ގިނަ އަދަދަކަށް މިރަށުން ފެންނަކަން ފާހަގަކުރެވެއެވެ. މިދޫންޏަކީ އާލާވާން ވަކި ޚާއްޞަ މާޙައުލެއް ބޭނުންވާ ދޫންޏެކެވެ. މީގެ އިތުރުން މިރަށުގެ ގޮނޑުދޮށް ފާހަގަކުރެވެނީ ގިނަ އަދަދަކަށް ވެލާ އަރާ ބިސްއަޅާ ސަރަހައްދެއްގެ ގޮތުގައެވެ.

މިރަށުގެ ގަސްތައް ހެދިފައިވާގޮތް ރާއްޖޭގެ އެހެން ރަށްރަށާއި ތަފާތުވުމާއި، ރާއްޖޭގައި ފޮރެސްޓް ނުވަތަ ބިޔަގަސް އެކުލެވޭ ޖަންގަލީގެ ގޮތުގައި ފާހަގަ ކުރެވޭ މާޙައުލުތައް މަދުވެފައި، މިރަށަކީ އެގޮތަށް ގިންތި ކުރެވޭނެ ސަރަހައްދަކަށްވެފައި މިރަށުގައި ފެންނަންހުރި ކުޅި، ފާ، ސަރަހައްދާއި، ރަށުގެ ފަރުގެ ސަރަހައްދާއި، ދޫނީގެ ބާވަތްތަކުގެ ޙާއްޞަކަމުން މިރަށް ޙިމާޔަތްކޮށް ބެލެހެއްޓުމަކީ މުހިއްމު ކަމެކެވެ.