ސަރަހައްދުގެ ބޮޑުމިން (ހެކްޓަރުން):
687.47
ހިމާޔަތްކުރި ތާރީޙް:
8 އޮކްޓޫބަރު 2020
| އިއުލާން/ގަވާއިދު ނަންބަރު: |
(IUL)438-ENV/438/2020/179
|
| ބައުންޑްރީގައި ހިމެނޭ ރަށްތައް: |
ޅ. ވައްވަރު |
ޅ.ވައްވަރަކީ ނައިފަރުގެ ދެކުނަށް އޮންނަ ފަޅު ރަށެކެވެ. މި ރަށުގެ ވަށައިގެންވާ ފަރަކީ ޤުދުރަތީ ދިރުންތަކުން މުއްސަނދި ފަރެކެވެ. މިފަރުތަކުން ފާހަގަ ކޮށްލެވޭ ދިރުންތަކުގެ ތެރޭގައި، ގިނަ އަދަދެއްގެ ސޮފްޓް ކޮރަލްއާއި، މަދުން ނޫނީ ނުފެންނަ 'ޔެލޯ މައުތުޑް މޮރޭ އީލް' (Gymnothorax nudivomer) އާއި، އެކި ބާވަތްތަކުގެ ކަޅުވެނާއި، އަދި ދަންބޮޑު މަހުގެ އައިންތައް ހިމެނެއެވެ. މިފަރުތަކުން ޢާއްމުގޮތެއްގައި ވެލައާއި އެންމަޑިއާއި، ވައިފިޔަ މަޑި، އަދި ކަންނެލި ގިނަ އަދަދަކަށް ފެނެއެވެ. މިފަރުގައި ހިމެނޭ ހޮހަޅަތަކާއި، މަތިން އެލިފައިވާ ފަރުގެ ނިޒާމް (އޯވާރހޭންގސް) ތަކާއި، އަދި ދަނބު ކުލައިގެ މުރަކަތަކަކީ، މި ފަރުގެ މުއްސަނދިކަން އިތުރުކޮށްދޭ ސިފަތަކެކެވެ. ވައްވާރާއި އިންވެގެން ދެކުނަށް އޮންނަ ފަޅުގައިވާ ދަނޑިފަޅު ފިނޮޅަކީ މިސަރަހައްދުގަިއ ހަރަކާތްތެރިވާ ގިނަ ބާވަތްތަކުގެ ކަނޑުމަތީ ދޫނިތައް ޖައްސާ، މިތަކެތި އާލާވެ، ދިރިއުޅޭ މާހައުލެކެވެ. އަދި މަސްމަހާއި މެހީގެ ނާރސަރީއެއްގެ ގޮތުގައި ވެސް ފާހަގަކުރެވިފައިވާ ތަނެކެވެ. ވައްވަރު ރަށާއި ދަނޑިފަޅު ފިނޮޅުގެ ދެމެދުގައިވާ، ދަނޑިފަޅު ކަނޑުއޮޅިއަކީ ތިމާވެށީގެ ގޮތުން މުއްސަނދި، މަދުން ނޫނީ ނުފެންނަ ބާވަތްތަކުގެ މަސްމަހާއިމެއްސާއި، މުރަކައިގެ ބާވަތްތައް ގިނަ ކަނޑުއޮޅިއެކެވެ. މި ތަނުން ފެންނަ ދިރުންތަކުގެ ތެރޭގައި ތަފާތު ބާވަތްތަކުގެ މަޑި، މިޔަރު، ވެލާ، ފާނަ، އަދި ފަރުތޮޅި ހިމެނެއެވެ. އަދި މި ސަރަހައްދަކީ ގިނަ އަދަދަކަށް 'ގޯރގޮނިއަން ފޭންސް' ފެންނަކަމަށް ރެކޯޑްކޮށްފައިވާ ކަނޑުއޮޅިއެކެވެ.